• Mohamed Sameh

مقال بالعامية المصرية | ماذا اعرف عن أسطورة " ممكن تنزل السعر؟ احنا لسه عندنا شغل جي كتير مع بعض"

النصيحة دي من خبرة فعلية و من قراءات على الانترنت


gif


لو انت في سوق الفويس أوفر بقالك فترة أكيد هتقابل ناس و انت بتسعر شغلك و بتتعامل مع عميل جديد فيقولك " تمام يا استاذ..بس انا عايزك تنزل شوية عشان البدجت و كمان ده مش أخر شغل! ده لسه فيه شغل كتير جي الفترة الجاية! انت بس شد حيلك معانا كده هاهاهاها!"



فتقوم انت منزل عن السعر اللي اديتهوله... يتبسط العميل و يستلم الشغل و من ثم يختفي!


هو مش بيختفي عشان شرير او كان قصده يضحك عليك مثلا و يجري..هو ممكن يكون أختفى عشان ببساطة المشروع اللي كان متفق معاه مع العميل مكملش. لكن في النهاية انت اللي طلعت خسران انك مشتغلتش بالسعر اللي تستحقة.



عشان كده النصيحة اللي بينصح بيها أغلب محترفين الفويس أوفر انك متديش تخفيض لأسعارك من البداية مقابل أي وعود. اتمسك بأسعارك لو شايف انها منطقية و معقولة و أوعد بأنك مستعد تدي تخفيض في المستقبل لو فيه كمية شغل تسمح بكده. انا حصل معايا موقف قبل كده و العميل قالي ده مبلغ كبير عليا و عايزين ننزل شوية و فيه شغل جي كتير. كان الرد ببساطه " طيب افرض مجاش؟ عندك ضمان ان الشغل ده جي؟ يعني ممكن نكتب عقد بعدد الأعمال و المقابل المطلوب؟" لو كان عنده رد كنا اتفقنا اتفاق رسمي لكن العميل هنا مكنش عنده رد و فهم وجهة نظري. لأن خلي بالك البعض بيفاصل عشان خاطر يفاصل و مش بيبقى عارف السعر اللي انت قولتهوله ده كويس ولا لا. و حتى لو قارن هو مش هيعمل مقارنة صحيحة لأنه في النهاية هيقيم سعر مقابل سعر مش موهبة و خبرة و دراسة الشخص وأشياء تانية كتير مقابل القيمة المادية.


حابب برضه أضيف في النهاية ان فيه بعض الناس ضد مبدأ التخفيض عامة و بيتغلبوا على ده عن طريق أي خدمات اضافيه ممكن تقدمها للعميل يكون ليها قيمة مادية و تديهاله مجانا في مشروع معين من مبدأ ان العميل يبقى واضح بالنسباله ان سعرك كمحترف فويس أوفر غير قابل للتفاوض. لكن في النهاية هي مدارس مختلفه و انت بتختار اللي يناسبك حسب ظروفك الشخصية.

11 views0 comments

Recent Posts

See All